الاقوال المأثورة للمصريين عن الأطفال ذوي الاحتياجات الخاصة:  

١- "ده بلاء من ربنا يا حبيبتي و ربنا لما يحب حد بيبتليه" علي قد ما الكلمة دي ممكن يبقي شكلها لطيف و نية اللي بيقولهالك انه أكيد يريحك لكن الحقيقة أني أوصف طفل برئ انه بلاء دي صعبة اوي.. أنا شايفة انه هدية من ربنا، فرصة ربنا بيديها للاهل عشان يعرفوا ربنا أكتر و يشوفوا معجزاته و نعمه علينا.. اي شخص بيتولد طبيعي بيمشي عادي و بيتكلم و يبص يمين و شمال عادي من غير اي مجهود والنَّاس بتتعامل ان ده شيئ عادي و المفروض لكن اللي عنده طفل من ذوي الاحتياجات بيشوف بعينيه قدرة ربنا بتتجلي قصاده كل يوم.. بيشوف إذ ايه ان مجرد بربشة عينيك حاجة مش سهلة و محتاجة مجهود و رغم كل ده تلاقي الأطفال دي عندها قدرة رهيبة علي الابتسام و السعادة رغم كل التحديات اللي بيواجهوها.. تالا علمتني ان لو جبل محطوط قصادي حقدر اعديه ان شالله اشيل حبة رمل واحدة كل يوم من الجبل ده.. علمتني الصبر و أني ابقي سعيدة بأي إنجاز صغير.. تالا اول مرة تعرف تبص تحت كنت حعمل فرح.. ازاي بلاء والنبي

٢- " الطفل ده يا عيني متخلف، ماتقربش منه" ، "اللهم احفظنا" مش معني ان ملامح الوش ممكن تبقي مختلفة و ان الطفل يبقي متأخر في مراحل التطور انه يبقي متخلف و نخاف منه.. الأطفال دي بتسمع حاجات مختلفة عننا زي التوحد مثلاً عندهم قدرة انه يسمع كل حاجة بتحصل حواليه و بصوت عالي ده يتعب اي بني آدم ، في منهم أحياناً بيبقي حجم اللسان اكبر من حجم الفم فغصب عنه يبقي لسانه برة ( مش عشان هو اهبل زي ما البعض بيفتكر) و في أمثال لا تعد ولا تحصي فا ياريت الناس تثقف نفسها و تفهم الاول و لو مش عايز تفهم يبقي ياريت بلاش إضافات من عندك تجرح بيها الأهل و الطفل.. و لو عايز تقول اللهم احفظنا يبقي في سرك و اللهم احفظنا من الجهل...

٣- " إنتي تاعبة نفسك اوي كده ليه؟ هي حتطلع اي يعني؟!!"

السؤال ده هو سبب كل المصايب لان الأطفال دي ممكن يطلع منهم كتير، ربنا بيديهم أحياناً قدرات خارقة. و حتي لو مفيش قدرات خارقة برده ممكن يطلع منهم حاجات كتيرة في الموسيقي في الفن عموماً في الرياضة في اي مجال.. لو بس بطلنا نسأل السؤال ده حنشوف معجزات..

٤- "هو إنتي عادي بتقولي ان بنتك مش طبيعية و بتخرجيها عادي، مش خايفة علي اخواتها؟ كده مش حيتجوزوا" 

آه والله بقول عادي و بخرجها و بنتي لذيذة جداً و كاريزما فظيعة عشان أنا محبستهاش.. الناس بتحبها و هي بتحبهم.. و هو مين فينا طبيعي اصلاً؟!! و اخواتها ايه اللي مش حيتجوزوا؟ ده اسمه علم الغيب.. في أيد ربنا حيتجوزوا ولا لأ.. و ممكن يبقي اخواتها عندهم طموحات اخري غير الجواز.. و ممكن اخواتها ان شاء الله عقبال ما يكبروا يبقوا الناس اللي بتفكر كده انقرضت أو اتعلمت ان الطفل ذوي الاحتياجات الخاصة كائن عايش مقدرش أخبيه و استعر منه.. ده أنا ببقي فخورة بتالا ان رغم انها كانت مش زي اي طفل كانت من وهي ٥ شهور بتلف علي الدكاترة و العلاج هي سعيدة و بتسعد اللي حواليها.. و سعادتها دي هي استمدتها مننا أنا و علي ، من ايماننا بيها وأن احنا لازم نخرجها تشوف الدنيا و تتبسط و تلعب.. 

يا ريت نحتضن الأطفال دي اكتر من كده.. يا ريت نشوفهم في الشوارع و النوادي و السينمات اكتر من كده.. مصر فيها كتير لكن مستخبيين في المدارس الخاصة أو في البيوت.. 

صدقتوا أو لا كل الكلام اللي أنا كاتباه ده سمعتو من ناس متعلمة والمفروض مثقفين مع الأسف!!